原创魏丽饶海上梦叠

原作：魏丽饶

沪语改写、诵读：倪云华

指导、推荐：丁迪蒙

编辑：王乙其

侬相信伐？乡愁拨了阿拉一种特异个功能。混迹于他乡十多年，我一眼就可以从万物当中挑出故乡个味道。

比方讲，第一趟从余庆路回到康平路个办公室，是一个五月个下半日。勿晓得是我身浪个哪里一只细胞，竟然勒伊条勿出名个小弄堂里，捕捉到了熟悉个味道，让我勿得勿停下了脚步。

我是有多少神奇啊！勒充满勒香樟树浓烈香气个弄堂里向，居然闻出一股淡淡个槐花清香。伊就搿能勿卑勿亢，温柔顺从个葡勒一家人家个墙头浪。风吹过，有浅浅个花瓣飘落，薄如蝉翼，轻盈似蝶。我弯腰捡起来，囥进棉麻裙子里向，一片，一片，一片。

侬晓得伐？我捡个勿是落花啊，是阿奶个轻声呼唤呀。每一片花瓣浪，侪写勒我老土个奶名。黄昏个辰光，村庄里闹纷纷个。眼看西山像饿煞鬼一样勒吞吃夕阳，阿奶急煞了。伊挽起拖勒脚面浪个藏青大围裙，立勒麦秸垛旁边朝对面高高个山头张望。

太阳再勿会同情伊呢，我也勿同情。搿些辰光我就骑勒半山腰个歪脖子槐树浪向。伊一定是着急了，抖抖划划个爬到了麦秸垛浪。伊手打喇叭冲我搿边喊来了，“二的——，二的——”阿奶每喊一声，就有一朵槐花飘落。

阿奶从来也勿催我写作业，也勿逼我做生活。伊只会讲，“快点回转来，阿奶做了好吃个。”我再勿理伊呢，越是稀奇个好吃个，阿奶越舍勿得吃。再晚回去，伊侪会拨我留勒海。

伊个辰光，我是多少任性啊。

乡间个野菜野果，是阿奶个子民。伊拉好像专门是为了阿奶个召唤再发芽生叶、开花结果个。明明是山里极平常个槐花，阿奶随手捋几串回来就可以做成槐花饼，槐花汤，槐花饺子，槐花饭……还有交关叫人馋吐水嗒嗒滴个好味道，我叫勿出名了。有阿奶勒海，我是用勿着管搿些个。伊总归可以老准确个捉牢紧凑个节令，拿搿眼时令野果野菜个功能发挥得淋漓尽致。

夜幕将合。我白相尽兴了，一身龌龊兮兮个从山浪向跑下来，搿辰光再发现身浪向拨蚊虫叮咬得一塌糊涂。乱七八糟抓几记，就拨饭菜个香味道吸引过去了。不过，阿奶总归可以瞄准我个软肋先发制人。伊拿清香个槐花饭盛到台子浪向晾勒海，却勿晓得拿调料囥到哪里去了。阿奶最晓得我贪搿一口，但是要先汏清爽一身龌龊再可以动筷子。

院子里向老早就晾好一大铁盆汏浴水，水里向散发出好闻个气味。阿奶用槐花，薄荷草，艾叶烧水拨我汏浴，杀菌消炎治疗蚊虫叮咬再好勿过了。伊从来勿用香皂，伊固执个认为，乡下头个物事之间是互生互克，自成体系个，伊有个是办法来指点搭平衡搿一切。

“咬人个虫子是害虫。”

“个么摘花草个二的是坏二的吗？”

“再勿是哩！花草勿痛个，二的会痛个。”

“命侪是一样金贵哩。”

阿奶轻轻叫舀起一勺勺好闻个花草水，拿我从头浇到脚……交关年之后，我个眼神里也慢慢叫长出了慈悲个根。

因而勒搿个宁静个弄堂口，我拨一树槐花挡牢了去路。确切个讲，勒浓烈个香樟香里，我是闻勿到伊个一抹浅淡个香气个，但看得真切。

对！看得见个香气。

伊个一年，我离开屋里个辰光，就是一个槐花盛开个五月。阿奶喜盈盈个从对面山坡浪向、满山雪白个槐花丛当中钻出来，围裙里兜勒一包新鲜个槐花。阿奶肯定勿晓得，伊勒灶披间里忙勒蒸槐花饭个辰光，还有几片鲜嫩个花瓣开勒伊个银发当中。搿是一股看得见个香甜。伊从来也勿晓得，年复一年个槐香，老早已经浸透了伊一面孔斑驳个皱纹，让伊成了一味恒久个怀念。尽管阿奶老快就走出了我个生命，搿香却永恒个弥漫勒我远行个路浪，成为一味治愈孤独个良药，成了我随身携带个鲜活生动个故乡。

勒上海，是极少能够看到槐树个，槐花就更加稀奇了。近年流行起中药香囊，竟真个有一味槐花香。故乡个味道正勒勒悄悄个走进他乡人们个生活，丰盈岁月，也带来健康。

诵读者：倪云华

————————————————————————————

丁迪蒙

迪蒙，启迪蒙昧者也。上海市人。原上海大学中文系教师，多年来一直致力于沪语和海派文化的传承。

沪语是吴方言的代表方言，是吴侬软语的典范。她既可以用来拉家常，也同样可以用来朗读各类诗歌散文。

沪语完全可以书写，同粤语可以写作是一样的。本平台所有文章都是经过改写后，用沪语来演绎的，汉字书写也是正确的。

丁迪蒙所撰写的，与沪语相关的著作主要有：

《学说上海话》上海科技文献出版社

《听听说说上海话》少年儿童出版社

《实用沪语》复旦大学出版社

《上海话绕口令》少年儿童出版社

《上海方言词语使用手册》上海教育出版社

《上海话读成语故事》少年儿童出版社

《囡囡学童谣》，少年儿童出版社

《囡囡学成语》，少年儿童出版社

原标题：《看得见的香气》